«Comedy.uz» кулгу жамоаси резидентлари алоҳида фаолият юритаётгани боис жамоа тарқалиб кетдими, деган гап-сўзлар пайдо бўлди. Бунга ойдинлик киритиш мақсадида журналист Феруз Муҳаммад «Comedy.uz» раҳбари Аброр Бахтиёрович билан суҳбатлашди.
— «Comedy.uz» резидентларининг ҳар бири алоҳида ижод қилмоқда. Жамоа тарқалиб кетдими?— Жамоамизга янги иштирокчилар қўшилиб, бошқаларининг кетиши аввал ҳам бўлган, бироқ жамоа ҳеч қачон тарқаб кетмаган. «Comedy.uz»нинг айрим резидентлари алоҳида ҳаракат қилаётгани рост, бироқ бу жамоа тарқаб кетди, дегани эмас. Шунчаки ҳозирча бир жамоа бўлиб концерт беришга вақт бўлмаяпти, холос.
— «Comedy.uz» ҳам «Миллион», «Дизайн» жамоалари сингари ҚВЗдан чиққан, аммо нима учун улар каби оммалашиб, дейлик, «Истиқлол» санъат саройида қайта ва қайта кўп кунлик концертлар бермади?— Жамоамиз қанчалик машҳур бўлган ёки бўлмагани ҳақида сиз ҳам, мен ҳам аниқ бир гап айта олмаймиз. Буни мухлислар ҳал қилади. Айтишим мумкинки, «Истиқлол» да 2013 йили бир марта концерт берганимиздан сўнг, талаблар кўп бўлгани учун ўша йили иккинчи концертни ҳам берганмиз. Бу етарлича яхши оммалашганимиздан дарак бўлса керак, менимча. Кейинчалик «Истиқлол»да концерт бермаганимизнинг иккита сабаби бор: биринчиси, вақт етишмовчилиги, иккинчиси эса «Истиқлол»да концерт дастурларини уюштираётганлар бизга кўп таклиф билан чиқади; тўғриси, ўзимиз концерт ташкил қилганимиздан кўра бошқаларнинг концертида иштирок этишимиз бизга кўпроқ даромад келтиради.
— «Зарафшон» концерт залида илк яккахон дастурингизни тақдим этишни режалаштираётган экансиз. Консентда «Comedy.uz» бошқа резидентлари қатнашмайдими?— «Comedy.uz» резидентларининг барчаси ўша ерда бўлади. Фақат бу сафар улар иштирокчи эмас, балки меҳмон сифатида қатнашишади. Улар билан ҳар доим ҳамфикр, дўстмиз. Ҳаммамиз бир оиладек бўлиб кетганмиз. Резидентлар билан шунчалик аҳилмизки, яхши-ёмон кунларимиз бир-биримизсиз ўтмайди.
— Адашмасам, сиз «Comedy.uz»да асосан бошловчилик қилардингиз, фақат айрим саҳна кўринишларда қатнашардингиз. Яккахон дастурингизда мухлислар сизни очилмаган қандай қиррангизни кўриши мумкин?— Ҳақиқатан ҳам «Comedy.uz» саҳнасида бошловчи бўлиб, ҳар янги номерни эълон қилиб борардим. «Comedy.uz» фаолиятида жамоанинг раҳбари, бошловчиси, продюсери, тўйлар бўйича администратори, пиармени, хуллас барча ташкилий ишларни ўзим бажарганим сабабли, ташкилотчиликдан ортиб, саҳнада рол ўйнашга имкон ҳар доим ҳам бўлавермаган. Ўтган 5—6 йилдан бери кўп ғояларим, саҳна кўринишларим қоғозда ёзилганича ётган эди. Барча ғояларимни тўпласам, камида 5—6 та яккахон концерт дастури уюштиришга етгулик экан. Шунинг учун дастлаб «Зарафшон»да 12 ноябрь куни концерт беришни ният қилдим. Умид қиламанки, дастурда меҳмон бўлган томошабинлар кетган икки соат вақтига ачинмайди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)