Хонанда Жаҳонгир Отажонов 28—29 октябрь кунлари Тошкентдаги «Истиқлол» санъат саройида 2016 йил ҳисобидан иккинчи, «Куз гуллари» деб номланган концерт дастурини тақдим этади. Концертолди тайёргарлик жараёнида меҳмон бўлган журналист Феруз Муҳаммад ўз фикрлари билан ўртоқлашди.
100 фоиз жонли ижрода бўладиган Жаҳонгир Отажоновнинг концертига тайёргарлик ҳам кутилмаган воқеаларга бой бўлади. Дастурда куйланадиган барча қўшиқларнинг бастакори ҳам ўзи бўлгани сабаб, Отажоновнинг созандаларга қўядиган талаби ҳам юқори. Масалан, мусиқа кўнглидагидек чиқмаган ҳолатларда Жаҳонгир Отажонов куйни ўзи чалиб кўрсатиб берганига ҳам гувоҳ бўлдик.
Хонанданинг консент-томоша фаолиятида ўзига хос янгилик — «Куз гуллари» дастурида Жаҳонгир Отажонов DJ хизматига мурожаат қилади. Аввал бунақаси бўлмаган. Концертда тахминан 16 та қўшиқ янграши кутилмоқда. Улардан 8—9 таси янги тароналар экани айтилмоқда.
Хонанда Саъдий Шерозий, Ҳофиз Хоразмий, Маҳтумқули сингари классиклар, Омон Матчон, Муҳаммад Юсуф, Иқбол Мирзо, Бобур Бобомурод каби замондошлар шеъриятига мурожаат қилган. Жаҳонгир Отажонов янги концертда куйлайдиган қўшиқлари орасида баъзи бир касб эгалари танқидига бағишланган тароналар ҳам бор.
Отажонов ҳар концертга энг камида икки ой тайёргарлик кўради. Хонанданинг маъмурлари Шерзод Магрупов ва Дамир Қўлдошевнинг маълум қилишича, «Куз гуллари»га жиддий тайёргарлик икки ойча аввал бошланган, концерт учун янги қўшиқлар ёзишга эса «Иштибоҳ» номли аввалги концерт тугаши билан киришилган эди.
«Куз гуллари» концерт дастури давомида созандалар Маҳкам Рўзметов (барабан), Сардор Шораҳмедов (бас-гитара), Темур Икромов (клавиш), Равшан Неъматов (клавиш), Нодир Тошхўжаев (электрогитара), Олим Тожиев (перкусси), Мардон Отажонов (диджей) Жаҳонгир Отажонов билан елкама-елка хизмат қилиши кутилмоқда.
Хонанданинг ёзда бўлган концертида тасвирчилар гуруҳи ишламаган эди. Бўлажак концертда тасвирчилар гуруҳи бўлиш-бўлмаслиги ҳозирча номаълум.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)