Айни кунларда барча шаҳар ва туманлар, қолаверса, мамлакатнинг хорижий давлатлардаги ваколатхоналарида Ўзбекистон Республикаси Президенти сайловига қизғин ҳозирлик кўрилмоқда. Сайловни ёритиш бўйича Республика матбуот маркази ходими Заурбек Асланов Адлия вазирлиги бошқарма бошлиғи, ҳуқуқий тарғибот ва маърифат бўйича давлат органлари ишларини мувофиқлаштириш идоралараро кенгаши котиби Алижон Очилов билан сайловчилар ҳуқуқий маданиятини юксалтириш бўйича олиб борилаётган ишлар хусусида суҳбатлашди.
— Табиийки, сайловнинг Ўзбекистон Республикаси Конституцияси ва қонунлари, сайлов бўйича халқаро ҳуқуқнинг умумэътироф этилган қоидалари асосида ўтиши кўп жиҳатдан фуқаролар сиёсий-ҳуқуқий маданияти, фаоллиги ва фуқаролик бурчини чуқур англашига боғлиқ, — дейди А. Очилов. — Демак, сайловчилар сиёсий-ҳуқуқий маданияти юксак бўлса, улар ушбу сиёсий жараёнда онгли равишда ёндашади, ўз овози давлат ва жамият ҳаёти, мамлакат келажаги учун муҳим аҳамиятга эга эканини тушуниб етади.
2016 йил 7 октябрида Марказий сайлов комиссияси шу мақсадда Ўзбекистон Республикаси Президенти сайловига тайёргарлик кўриш даврида сайловчилар ҳуқуқий маданиятини янада юксалтириш бўйича ўтказиладиган тадбирлар дастурини тасдиқлаганди. Мазкур дастур аҳоли ўртасида миллий сайлов тизими, «Ўзбекистон Республикаси Президенти сайлови тўғрисида»ги қонун, ушбу қонунга кейинги йилларда киритилган ўзгартиш ва қўшимчалар, шунингдек, Марказий сайлов комиссиясининг сайлов масалаларини тартибга солувчи қарорлари мазмун-моҳияти ҳамда сайловчиларнинг бу борадаги ҳуқуқ ва эркинликларини кенг тушунтириш ишларини олиб боришга қаратилган чора-тадбирлар кўзда тутилгани билан аҳамиятлидир.
— Дастурни ҳаётга татбиқ этиш доирасида қандай чора-тадбирлар амалга оширилмоқда?
— Шу кунларда ушбу дастурда белгиланган вазифалардан келиб чиқиб, сайловга оид 16 та оммабоп рисола тайёрланди. «Ўзбекистон Республикаси Президенти сайлови тўғрисида»ги қонун ҳамда «Ўзбекистон Республикасининг сайлов тўғрисидаги қонунлари» тўплами чоп этилиб, жойларга етказилди.
Дастлабки ҳисоб-китобларга кўра, ҳозирга қадар жойларда 5000 дан ортиқ ҳуқуқий тарғибот тадбири ўтказилди. Уларнинг аксарияти учрашув, давра суҳбати ва семинар шаклида амалга оширилгани учун ҳам сайловчилар билан юзма-юз гаплашиш имкониятини яратди. Масалан, шу йил 21 октябрида Тошкент шаҳрида Марказий сайлов комиссияси ҳамда Адлия вазирлиги ҳамкорлигида сайлов қонунчилигини бузганлик учун жавобгарлик мавзусига бағишланган амалий семинар ўтказилди.
Хорижий мамлакатларда ҳам Ўзбекистон Республикаси Президенти сайлови жараёнига бўлган қизиқиш кундан-кунга ортиб бормоқда. Буни чет эллардаги оммавий ахборот воситаларида 600 дан ортиқ мақола ва материал эълон қилингани ҳам тасдиқлаб турибди.
Дастур асосида хотин-қизлар, нуронийлар, имконияти чекланган шахслар, ёшлар, шу жумладан, биринчи маротаба овоз берувчи фуқаролар ўртасида ҳам самарали тарғибот-ташвиқот ишлари ташкил этилмоқда.
— Маълумки, жорий йилги сайловда биринчи марта овоз берадиган йигит-қизлар ҳам кўпчиликни ташкил этади. Уларнинг сайлов ҳақида билимларини ошириш бўйича қандай ишлар олиб бориляпти?
— Сайловда биринчи марта қатнашаётган йигит-қизларнинг сайловга оид билимларини юксалтириш масаласига бу борадаги устувор вазифалардан бири сифатида эътибор қаратилмоқда. Шу мақсадда олий, ўрта махсус, касб-ҳунар таълими муассасаларидаги ахборот ва мураббийлик соатларида, маънавият кунларида ўқувчи ва талабаларга сайловга оид қонун ҳужжатлари, сайловда овоз бериш қоидалари тушунтирилмоқда.
Олий ва ўрта махсус, касб-ҳунар таълими муассасалари учун Президент сайловининг ҳуқуқий асосларини ўрганиш юзасидан 4 соатга мўлжалланган махсус курс ўқув дастури тайёрланди. У асосида 1637 та таълим муассасасида «Ўзбекистон Республикаси Президенти сайловини ташкил этиш ва ўтказишнинг ташкилий-ҳуқуқий асослари» мавзусида машғулотлар олиб борилмоқда.
Изоҳ (0)