Муваффақиятли тадбиркорлардан барчасига улгуриш сирлари

Оғир иш куни якунида бажариш керак бўлган ишларнинг ярмига ҳам улгурмаслик билан боғлиқ ҳолат сизга танишми? Бунинг сабаби, қанчалик ғалати бўлмасин, вақтнинг етишмаслиги эмас, балки уни ташкиллаштиришга тўғри ёндашмасликдир.

Ушбу муаммони бартараф этиш учун турли усуллар мавжуд. Энг самарали усулларни эътиборингизга ҳавола этамиз.

1. Барчаси қатъий режа бўйича кетиши керак!

Ишни бошлашдан аввал сиз учун ҳақиқатда энг муҳим бўлган вазифаларни аниқ белгилаб олинг. Агар сиз қатъий режа асосида ҳаракат қилмасангиз, қувватингизнинг 80 фоизга яқини бекорга сарфланади.

Дейлик, сиз журналистсиз ва кун охирига қадар таҳририятга учта мақола топширишингиз керак. Агар сиз аниқ режа тузиб — мақолаларнинг номланиши, тузилиши ва тезисларини олдиндан ёзиб олсангиз, ишлашингиз анча осонроқ бўлади!

2. Ўзингизни қандай ҳис қилаётганингизга эътибор беринг.

Олдингизга қўйган мақсадларингизга эришишингиз учун аъло даражадаги ҳаётий фаолликка эга бўлишингиз керак. Бу масалада етарлича жисмоний фаоллик, тўлақонли уйқу ва тўғри овқатланиш сизнинг иттифоқчиларингизга айланади.

Агар иш давомида бирор бир ноқулайликни ҳис қилсангиз унинг сабабини бартараф этишингиз керак. Тамадди қилиб олинг, сайр қилинг, қаҳва ёки бир стакан совуқ сув ичинг. Танангизга ишлаш қулай бўлганда, мия ҳам максимал даражада маҳсулдор ишлай бошлайди.

3. «2 дақиқа» аксиомаси.

Агар кун давомида сиздан икки дақиқа ажратишни талаб қилувчи ишлар юзага келса, (масалан, электрон почта орқали хат жўнатиш, SMS орқали жавоб қайтариш ва бошқа) уларни шу заҳоти бажаринг! Ортга сурилган икки дақиқалик ишлар кейин кўпроқ вақт талаб қилиши амалда исботланган.

4. «5 дақиқа» аксиомаси.

Агар жуда зерикарли, мураккаб вазифани бажаришингиз керак бўлса (масалан, куч сарфланадиган машғулотлар ёки бухгалтерия бўйича махсус китобни ўқиш) уни амалга оширишга ҳеч қандай истак бўлмаган вақтда шу ишни бажаришга киришманг.

Яхшиси «5 дақиқа» қоидасини жорий қилинг: бу сиз ёқтирмаган иш билан ҳар куни беш дақиқа шуғулланишни англатади (фақат мунтазам бажариш шарти билан). Бироз вақт ўтиб, сиз белгиланган беш дақиқалик чегарадан чиқиб кетганингизни пайқамай қоласиз.

5. Омадли одамларнинг қоидаси.

Агар мақсадингиз бирор соҳада профессионаллика эришиш бўлса, танлаган ишингиз билан ҳар куни шуғулланинг! (Байрам ва дам олиш кунлари бундан мустасно эмас!)

Интернет манбалари асосида тайёрланди

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.