Алишер Усмонов Россия солиқ резиденти мақомидан маҳрум бўлди

Россиялик миллиардер Алишер Усмонов Россиянинг солиқ резиденти мақомидан маҳрум бўлди. Бу ҳақда, ишбилармоннинг активлари учун асосий тузилма ҳисобланган USM холдинги матбуот хизматига асосланиб, Forbes хабар бермоқда.

USM’даги манбанинг маълум қилишича, Алишер Усмонов ҳозирги вақтда операцион фаолият билан шуғулланмаяпти, у асосий эътиборини спорт соҳасидаги ва хайрия фаолиятига қаратган.

Россия Солиқ кодексига мувофиқ, мамлакат солиқ резиденти мақомини олиш учун шахс бир йил давомида камида 183 кун Россия ҳудудида бўлиши керак. «Алишер Усмонов спорт ва хайрия фаолияти, шунингдек, тиббий сабабларга кўра, 2015 йили 183 кундан камроқ вақт давомида Россияда бўлди», — деди нашр суҳбатдоши.

Нашр суҳбатдошининг қайд этишича, Алишер Усмоновнинг Россия солиқ резиденти мақомидан маҳрум бўлгани USM холдинги тузилмаси ва бизнесига таъсир қилмайди.

USM вакилининг қайд этишича, Алишер Усмонов сўнгги йилларда Россияда жисмоний шахс сифатида солиқлар кўринишида 350 миллион доллар тўлаган, унинг холдинги таркибига кирувчи компаниялар эса биргина 2015 йилнинг ўзида 100 миллиард рублга яқин тўловларни амалга оширган.

Алишер Усмонов Халқаро қиличбозлик федерацияси президенти ва Халқаро олимпия қўмитасининг Олимпия телеканалини ривожлантириш бўйича комиссияси аъзоси ҳисобланади. Forbes ҳисоб-китобига кўра, Алишер Усмоновнинг бойлиги 12,5 миллиард долларга тенг ва у Россиянинг энг бадавлат 200 одами рўйхатида учинчи ўринда туради.

Миллиардер 2012 йили Forbes нашрига берган интервьюсида беш йилдан сўнг бизнесдан кетиб, асосий эътиборини хайрия лойиҳаларига қаратишини айтиб ўтган эди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.