Бразилия қамоқхоналаридан биридаги тартибсизликлар чоғида маҳбуслардан камида 25 нафари ўлдирилди. Бу ҳақда «ТАСС» хабар бермоқда.
Ҳодиса мамлакат шимолидаги Рорайма штати, Боа-Виста аҳоли пунктида жойлашган қамоқхонада рўй берди. Globo телеканалига кўра, бир неча кишининг боши танасидан жудо этилган, камида 7 кишининг жасади ёқиб юборилган.
Исён 16 октябрь, якшанба куни кечки пайт, маҳбусларнинг яқинлари ва дўстларига уларни кўришга рухсат бериладиган вақтда бошланди. Пичоқ ва таёқлар билан қуролланган бир неча ўнлаб киши муассасанинг бир қанотини иккинчисидан ажратадиган тўсиқни бузиб ўтган. Қамоқхонага келган 100 га яқин одам гаровда қолди, бироқ ҳозирга келиб улар озод қилингани билдирилмоқда.
Ҳарбий полиция вакилларининг таъкидлашича, тартибсизликлар қарама-қарши гуруҳларнинг ўзаро можароси туфайли юз берди. Ўз навбатида, Рорайма штати жазони ўташ муассасалари ходимлари касаба уюшмаси маълумотига кўра, Боа-Вистадаги 740 кишига мўлжалланган қамоқхонада 1400 нафар маҳбус сақланмоқда ва уларнинг хавфсизлигини таъминлаш имконияти мавжуд эмас.
Изоҳ (0)