Alisher Usmonov Rossiya soliq rezidenti maqomidan mahrum bo‘ldi
Rossiyalik milliarder Alisher Usmonov Rossiyaning soliq rezidenti maqomidan mahrum bo‘ldi. Bu haqda, ishbilarmonning aktivlari uchun asosiy tuzilma hisoblangan USM xoldingi matbuot xizmatiga asoslanib, Forbes xabar bermoqda.
USM’dagi manbaning ma’lum qilishicha, Alisher Usmonov hozirgi vaqtda operatsion faoliyat bilan shug‘ullanmayapti, u asosiy e’tiborini sport sohasidagi va xayriya faoliyatiga qaratgan.
Rossiya Soliq kodeksiga muvofiq, mamlakat soliq rezidenti maqomini olish uchun shaxs bir yil davomida kamida 183 kun Rossiya hududida bo‘lishi kerak. “Alisher Usmonov sport va xayriya faoliyati, shuningdek, tibbiy sabablarga ko‘ra, 2015-yili 183 kundan kamroq vaqt davomida Rossiyada bo‘ldi”, — dedi nashr suhbatdoshi.
Nashr suhbatdoshining qayd etishicha, Alisher Usmonovning Rossiya soliq rezidenti maqomidan mahrum bo‘lgani USM xoldingi tuzilmasi va biznesiga ta’sir qilmaydi.
USM vakilining qayd etishicha, Alisher Usmonov so‘nggi yillarda Rossiyada jismoniy shaxs sifatida soliqlar ko‘rinishida 350 million dollar to‘lagan, uning xoldingi tarkibiga kiruvchi kompaniyalar esa birgina 2015-yilning o‘zida 100 milliard rublga yaqin to‘lovlarni amalga oshirgan.
Alisher Usmonov Xalqaro qilichbozlik federatsiyasi prezidenti va Xalqaro olimpiya qo‘mitasining Olimpiya telekanalini rivojlantirish bo‘yicha komissiyasi a’zosi hisoblanadi. Forbes hisob-kitobiga ko‘ra, Alisher Usmonovning boyligi 12,5 milliard dollarga teng va u Rossiyaning eng badavlat 200 odami ro‘yxatida uchinchi o‘rinda turadi.
Milliarder 2012-yili Forbes nashriga bergan intervyusida besh yildan so‘ng biznesdan ketib, asosiy e’tiborini xayriya loyihalariga qaratishini aytib o‘tgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
