Физика бўйича жорий йилги Нобель мукофоти материянинг топологик фазалари ҳамда топологик фазалар ўтиши соҳасидаги назарий кашфиётлар учун берилди. Мукофотни америкалик уч олим — Жон Майкл Костерлиц (Браун университети, Провиденс), Дэвид Жеймс Таулес (Вашингтон университети, Сиэтл) ва Дункан Халдейн (Принстон университети, Нью-Жерси) бўлишиб олади, деб хабар беради «Ведомости».
Олимлар биринчи марта материянинг экзотик ҳолатдаги хулқ-атворини назарий жиҳатдан қониқарли тушунтириб берди. Улар топологиянинг математик аппаратидан фойдаланган ҳолда макродаражада квант конденсати фазасида намоён бўладиган квант эффектларини тушунтириб бериб, наноструктуралар топологик юқори ўтказувчанлиги назариясини яратди. Костерлиц–Таулес фазавий ўтишининг моҳияти паст ҳароратда ўзаро боғланган гирдоб-аксилгирдоб жуфтликлари ҳолатининг юзага келишидадир.
Ушбу назария амалий жиҳатдан юқори ўтказгичлар ва истиқболли электроникада, шунингдек, бўлажак квантли компьютерларда қўлланилиши мумкин.
Изоҳ (0)