Ўзбекистонга қарши ўйинда 3 та гол ва 1 та автогол урган Рикардиньо ЖЧ—2016 нинг энг яхши тўпурари бўлди

Аргентина терма жамоасининг чемпионлиги билан якунига етган футзал мундиалидан кейин энг яхшиларни тақдирлаш маросими бўлиб ўтди.

Унга кўра португалиялик футзалчи Рикардиньо 12 та гол билан энг яхши тўпурар учун аталган совринни ўзиники қилиб олди. Гуруҳ босқичида Рикардинё Ўзбекистон дарвозасига 3 та гол урган бўлиб, ўша учрашувда ўз дарвозасини ишғол қилишни ҳам унутмаганди.

Тўпурарлар пойгасида иккинчи ўрин бразилиялик Фалькаога насиб қилди. Унинг ҳисобида 10 та гол бор эди. Россиялик Эдер Лимага ҳам 10 та гол урганига қарамай, 3-ўринда қолди. Чунки унда голли узатмалар сони Фалькаоникидан 7 тага камроқ эди.

Жаҳон Чемпионатининг энг яхши дарвозабони деб аргентиналик Николас Сармиенто топилди. У турнир давомида 73 та сейвни амалга ошириб, якунда Аргентинанинг чемпион бўлишига катта ҳисса қўшди. Жумладан, Қозоғистон, Украина, Миср термаларига қарши ўйинларда дарвозаси даҳлсизлигини сақлаб қолди.

Аргентина терма жамоаси сардори Фернандо Вилгелм ЖЧ—2016 нинг энг яхши футзалчиси учун аталган совринга эга чиқди. Россиялик Эдер Лима иккинчи, эронлик Аҳмад Исмоилпур учинчи бўлиш бахтига мушарраф чиқди.