АҚШ ва Канада палеонтологлари икки давлат соҳилларини ювувчи Фанди кўрфази қирғоғидаги Жоггинс-Клиффс қояларидан аввал фанга маълум бўлмаган улкан мингоёқларнинг учта тури тош қолдиқларини аниқлади. Бу ҳақда «ТАСС» хабар бермоқда.
Мингоёқларнинг узунлиги 30 сантиметрга боргани эҳтимолдан ҳоли эмас. Улар ўтхўр бўлган ва бундан тахминан 300 миллион йил аввал, яъни тош-кўмир даврида қадимги ўрмонларда истиқомат қилган.
«Намуналарда кўплаб оёқлар излари кўриниб турибди, бироқ улар тўлиғича қандай кўринишга эга бўлганини билмаймиз. Балки уларда умуртқага ўхшаш нимадир бўлгандир, балки йўқ», — дейди Кливленд табиат тарихи музейи палеонтологи Жо Хэннибэл.
Тадқиқотчининг сўзларига кўра, ҳозирда олимлар мазкур кўпоёқли жониворлар эволюция жараёнида қандай ўрин эгаллаганини аниқлашга ҳаракат қилмоқда.
Изоҳ (0)