«Пахтакор» ва «Локомотив» клублари ўртасидаги Тошкент дербисини Равшан Эрматов бошқаради

28 сентябрь куни футбол бўйича Ўзбекистон Олий Лигасида 24-тур учрашувлари старт олади ва унинг доирасида мамлакатнинг амалдаги чемпиони «Пахтакор» жорий мавсум чемпионлик учун энг яқин бўлган «Локомотив»ни қабул қилади.

ЎзПФЛ сайти мазкур клублар иштирокидаги Тошкент дербиси Равшан Эрматов бошчилигидаги ҳакамлар бригадасига ишониб топширилганини маълум қилди. Унга қанотларда Абдуҳамидулло Расулов ва Жаҳонгир Саидов ёрдам беради.

28 сентябрь куни Тошкентнинг «Бунёдкор» клубини ҳам қийин учрашув кутиб турибди. Сергей Лушчан жамоаси шу куни «Бухоро» меҳмони бўлади.

Ўзбек футболи мухлислари яна иккита дербига гувоҳ бўлиши мумкин. Водий дербисида «Навбаҳор» Қўқонга ташриф буюрса, воҳа дербида «Шўртан» ва «Машъал» ўзаро тўқнаш келади. Бу беллашувлар 30 сентябрь куни ўтказилади.

30 сентябрда, шунингдек, «Насаф» — «Металлург», «Андижон» — «Қизилқум», «Обод» — «Нефтчи», «Олмалиқ» — «Сўғдиёна» ўйинлари ҳам бор.