“Paxtakor” va “Lokomotiv” klublari o‘rtasidagi Toshkent derbisini Ravshan Ermatov boshqaradi
28-sentabr kuni futbol bo‘yicha O‘zbekiston Oliy Ligasida 24-tur uchrashuvlari start oladi va uning doirasida mamlakatning amaldagi chempioni “Paxtakor” joriy mavsum chempionlik uchun eng yaqin bo‘lgan “Lokomotiv”ni qabul qiladi.
O‘zPFL sayti mazkur klublar ishtirokidagi Toshkent derbisi Ravshan Ermatov boshchiligidagi hakamlar brigadasiga ishonib topshirilganini ma’lum qildi. Unga qanotlarda Abduhamidullo Rasulov va Jahongir Saidov yordam beradi.
28-sentabr kuni Toshkentning “Bunyodkor” klubini ham qiyin uchrashuv kutib turibdi. Sergey Lushchan jamoasi shu kuni “Buxoro” mehmoni bo‘ladi.
O‘zbek futboli muxlislari yana ikkita derbiga guvoh bo‘lishi mumkin. Vodiy derbisida “Navbahor” Qo‘qonga tashrif buyursa, voha derbida “Sho‘rtan” va “Mash’al” o‘zaro to‘qnash keladi. Bu bellashuvlar 30-sentabr kuni o‘tkaziladi.
30-sentabrda, shuningdek, “Nasaf” — “Metallurg”, “Andijon” — “Qizilqum”, “Obod” — “Neftchi”, “Olmaliq” — “So‘g‘diyona” o‘yinlari ham bor.
