Ўзбекистонда шартнома бўйича ҳарбий хизматга унвонидан қатъи назар 5 йил муддатга қабул қилиш тартиби жорий этилди

Ўзбекистоннинг «Умумий ҳарбий мажбурият ва ҳарбий хизмат тўғрисида»ги қонунига киритилган ўзгаришларга мувофиқ, шартнома асосида ҳарбий хизматга қабул қилинаётган шахслар билан дастлабки шартнома 5 йил муддатга тузилади. Бу ҳақда Norma хабар бермоқда.

Қайд этишларича, ҳарбий хизматда бўлишга имкон берувчи ёшга қадар 5 йилдан кам қолган бўлса, шартнома бундан оз муддатга тузилиши мумкин.

Авваллари хизматни ўташ ҳақидаги дастлабки шартнома муддати унвонга боғлиқ эди. Жумладан, шартнома оддий аскар ва сержантлар билан 3 йил, офицерлар таркиби лавозимларида ўташ бўйича эса 5 йилга тузилар эди.

Ҳарбий хизматни ўташ муддати ва унинг асосий шартлари, аввалгидек, шартномада ўз аксини топади.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.