Колумбия—2016. Мезбонлар Жаҳон Чемпионатини тарк этган куни россиялик футзалчилар чорак финалга чиқди

Колумбияда давом этаётган футзал бўйича Жаҳон Чемпионатида чорак финалга йўлланма олган икки жамоа номига ойдинлик киритилди.

Нимчорак финалнинг илк ўйинида мундиал мезбони Парагвайга қарши залга чиқди. Учрашувда ҳисоб очилмади — 0:0. Ўйиндан кейинги пенальтилар сериясида 3:2 ҳисобида зафар қучган парагвайликлар чемпионлик учун курашни давом эттирадиган бўлди. Ўзбекистон термасини гуруҳ босқичида мағлуб эта олмаган Колумбия эса турнир билан хайрлашди.

1/8 финалнинг иккинчи ўйинида россиялик футзалчилар Вьетнамга имконият қолдирмади — 7:0.

Чорак финалга йўл олган Парагвай терма жамоаси 24 сентябрь куни Бразилия — Эрон ўйини ғолибига қарши саф тортади. Россия эса ярим финал йўлидаги беллашув учун Испания — Қозоғистон жуфтлиги ғолибини кутиб турибди.