Kolumbiya—2016. Mezbonlar Jahon Chempionatini tark etgan kuni rossiyalik futzalchilar chorak finalga chiqdi

Kolumbiyada davom etayotgan futzal bo‘yicha Jahon Chempionatida chorak finalga yo‘llanma olgan ikki jamoa nomiga oydinlik kiritildi.

Nimchorak finalning ilk o‘yinida mundial mezboni Paragvayga qarshi zalga chiqdi. Uchrashuvda hisob ochilmadi — 0:0. O‘yindan keyingi penaltilar seriyasida 3:2 hisobida zafar quchgan paragvayliklar chempionlik uchun kurashni davom ettiradigan bo‘ldi. O‘zbekiston termasini guruh bosqichida mag‘lub eta olmagan Kolumbiya esa turnir bilan xayrlashdi.

1/8 finalning ikkinchi o‘yinida rossiyalik futzalchilar Vyetnamga imkoniyat qoldirmadi — 7:0.

Chorak finalga yo‘l olgan Paragvay terma jamoasi 24-sentabr kuni Braziliya — Eron o‘yini g‘olibiga qarshi saf tortadi. Rossiya esa yarim final yo‘lidagi bellashuv uchun Ispaniya — Qozog‘iston juftligi g‘olibini kutib turibdi.