Украина бош прокуратураси Порошенкони сўроққа чақирди

Украина бош прокуратураси мамлакат президенти Пётр Порошенкони 2014 йилги Қадр-қиммат инқилоби юзасидан олиб борилаётган иш бўйича сўроққа чақирди. Бу ҳақда бош прокурор Юрий Луценко 17 сентябрь куни 13-Ялта Европа стратегияси учрашуви чоғида маълум қилди, деб хабар беради «Корреспондент.net».

«Биз президентни сўроққа чақирдик. У БМТдаги командировкадан қайтиши ҳамон терговчилар билан учрашув ўтказилишига келишиб олдик», — деди Луценко.

18–21 сентябрь кунлари Порошенко АҚШда бўлиб, БМТ Бош Ассамблеясида ва Хавфсизлик Кенгашида чиқиш қилади.

Илгарироқ Бош прокуратура терговчилари ички ишлар вазири Арсен Аваков, Миллий хавфсизлик ва мудофаа хизмати котиби Александр Турчинов ва собиқ бош вазир Арсений Яценюкни сўроққа тутган эди.