Ukraina bosh prokuraturasi Poroshenkoni so‘roqqa chaqirdi

Ukraina bosh prokuraturasi mamlakat prezidenti Pyotr Poroshenkoni 2014-yilgi Qadr-qimmat inqilobi yuzasidan olib borilayotgan ish bo‘yicha so‘roqqa chaqirdi. Bu haqda bosh prokuror Yuriy Lutsenko 17-sentabr kuni 13-Yalta Yevropa strategiyasi uchrashuvi chog‘ida ma’lum qildi, deb xabar beradi “Korrespondent.net”.

“Biz prezidentni so‘roqqa chaqirdik. U BMTdagi komandirovkadan qaytishi hamon tergovchilar bilan uchrashuv o‘tkazilishiga kelishib oldik”, — dedi Lutsenko.

18–21-sentabr kunlari Poroshenko AQShda bo‘lib, BMT Bosh Assambleyasida va Xavfsizlik Kengashida chiqish qiladi.

Ilgariroq Bosh prokuratura tergovchilari ichki ishlar vaziri Arsen Avakov, Milliy xavfsizlik va mudofaa xizmati kotibi Aleksandr Turchinov va sobiq bosh vazir Arseniy Yatsenyukni so‘roqqa tutgan edi.