«Бойвачча куёв»: Ўзбек қайнонаси ролида рус актрисаси

Режиссёр Баҳром Ёқубовнинг «Бойвачча куёв» деб номланган фильми тез кунларда катта экранларга чиқиши кутилмоқда. Тақдимот арафасида журналист Феруз Муҳаммад фильм режиссёри билан суҳбатлашди.

— «Бойвачча куёв» номли навбатдаги кинокомедиянгизда қайнона ролига рус актрисасини таклиф қилиб, ўзига хос тажрибага қўл урибсиз.— Ҳа. Болалар уйида рус тарбиячи аёлнинг қўлида катта бўлган йигит, уйланиш ёшига етганида: «Қандай қилиб қайнонасиз келин бўлиши мумкин? Келин эрталаб туриб кимга салом беради? Унга билмаганларини ким ўргатади?», дея ўзига ўзи савол беради. Бир куни тарбиячисига: «Сиз нима учун болаларингизнинг ёнига — Россияга кетмагансиз?», дея савол берса, тарбиячи: «Шу ерда ёшлигим ўтди, эрим билан шу юртда танишиб, оила қурдим, уни шу юртга дафн қилдик. Бу юрт — менинг Ватаним», деб жавоб беради. Шунда йигит: «Ундай бўлса, сиз менга она, хотинимга қайнона бўласиз», мазмунида фикр билдиради. Қайнона ролини Ўзбекистонда хизмат кўрсатган актриса Олга Володина маромига етказиб ижро қилган.

— Фильмда яна қайси машҳур актёр-актрисаларни кўриш мумкин?— Фильмда Мурод Ражабов, Саида Раметова, Муҳаммадисо Абдулхаиров, Юлдуз Ражабова, Асқар Ҳикматов, Зарина Низомиддинова, Алишер Усмонов, Зуҳра Солиева кабилар рол ижро этган.

— Фильм учун махсус саундтрекни куйлаш кимга ишониб топширилди?— Шаҳзода томонидан «Пари» деб номланган қўшиқ айнан шу фильм учун махсус саундтрек сифатида куйланди.

— Фильмда юлдузли жамоа тўпланган, саундтрекни эса Шаҳзода куйлаган. Айтинг-чи, фильмнинг моддий томонини кўтариш кимнинг зиммасига тушган?— Бу ҳар сафар ҳар хил кечадиган жараён. Баъзи фильмларимизда «биз ҳам пул тикиб, фойда кўрайлик», деб келган продюсерлар билан ҳамкорлик қилганмиз, баъзи фильмларимизни суратга олишда эса аввалги фильмдан тушган фойдани йўналтирганмиз. «Бойвачча куёв»нинг моддий томонларини ўзимиз кўтардик.

— Фильм премьераси қачонга режалаштирилган?— Фильм премьерасини куз ойларидан бирига мўлжаллаганмиз.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.