Америкалик теннисчилар Серена ва Винус Уильямслар Бутунжаҳон аксилдопинг агентлиги (WADA) рухсати билан терапевтик мақсадларда тақиқланган моддаларни қабул қилгани маълум бўлди. Бу ҳақда Fancy Bear хакерлик гуруҳи тармоққа жойлаштирган ҳужжатларга таянган ҳолда «РИА Новости» хабар бермоқда.
Хакерлар агентликнинг маълумотларига дахл қилишга муваффақ бўлди ҳамда уларни интернет орқали тарқатди. Уларга кўра, Серена Уильямс агентлик рухсати билан 2010, 2014 ва 2015 йилларда оксикодон, гидроморфон, преднизон, преднизолон ва метилпреднизолон, унинг синглиси Винус эса 2010–2013 йилларда преднизон, преднизолон, триамцинолон ва формотерол қабул қилган экан. Бу моддаларга рухсат берилишига қандай ташхис сабаб бўлгани ҳужжатларда айтилмаган.
Ҳужжатлардан маълум бўлишича, америкалик гимнастикачи Симона Байлзнинг допинг намуналари ижобий натижа берганига қарамай у дисквалификация қилинмаган экан. Маълумот учун, Байлз Рио Олимпиадасида тўртта олтин медални қўлга киритди.
Изоҳ (0)