WADA opa-singil Uilyamslar dopingdan foydalanishiga ruxsat bergani ma’lum bo‘ldi

Amerikalik tennischilar Serena va Vinus Uilyamslar Butunjahon aksildoping agentligi (WADA) ruxsati bilan terapevtik maqsadlarda taqiqlangan moddalarni qabul qilgani ma’lum bo‘ldi. Bu haqda Fancy Bear xakerlik guruhi tarmoqqa joylashtirgan hujjatlarga tayangan holda “RIA Novosti” xabar bermoqda.

Xakerlar agentlikning ma’lumotlariga daxl qilishga muvaffaq bo‘ldi hamda ularni internet orqali tarqatdi. Ularga ko‘ra, Serena Uilyams agentlik ruxsati bilan 2010, 2014 va 2015-yillarda oksikodon, gidromorfon, prednizon, prednizolon va metilprednizolon, uning singlisi Vinus esa 2010–2013-yillarda prednizon, prednizolon, triamsinolon va formoterol qabul qilgan ekan. Bu moddalarga ruxsat berilishiga qanday tashxis sabab bo‘lgani hujjatlarda aytilmagan.

Hujjatlardan ma’lum bo‘lishicha, amerikalik gimnastikachi Simona Baylzning doping namunalari ijobiy natija berganiga qaramay u diskvalifikatsiya qilinmagan ekan. Ma’lumot uchun, Baylz Rio Olimpiadasida to‘rtta oltin medalni qo‘lga kiritdi.