Барак Обама ва Си Цзиньпин Ўзбекистон Президентини Мустақиллик байрами билан қутлади

Ўзбекистон мустақиллигининг 25 йиллиги муносабати билан Президент Ислом Каримов номига хорижий давлатлар ва ҳукуматлар, нуфузли халқаро ташкилотлар раҳбарлари, таниқли жамоат арбоблари, ишбилармон ва академик доиралар вакилларидан самимий қутловлар келиб турибди, дея хабар бермоқда ЎзА.

АҚШ президенти Барак Обаманинг мактубида шундай дейилади:

«Ўзбекистон Президенти Ислом Каримов Жаноби Олийларига

Президент Жаноби Олийлари!

1 сентябрда нишонланадиган Ўзбекистон мустақиллигининг 25 йиллиги муносабати билан Америка Қўшма Штатлари халқи номидан Сизга ва Ўзбекистон халқига қизғин табрикларимни йўллайман.

Мамлакатингиз бу тарихий санани байрам қилаётган шу кунларда биз Ўзбекистон мустақиллиги, суверенитети ва ҳудудий яхлитлигини доимо қўллаб-қувватлашимизни яна бир бор таъкидлаймиз. Америка Қўшма Штатлари 1991 йилнинг 25 декабрида биринчилардан бўлиб Ўзбекистон мустақиллигини тан олган пайтдан бошлаб мамлакатларимиз ўртасида мустаҳкам шериклик муносабатлари ўрнатилган. Мамлакатларимизнинг янада хавфсиз, фаровон ва демократик келажак йўлидаги ҳамкорлиги узоқ йиллар давом этишига ишонаман.

Америка Қўшма Штатлари халқи Сизни мустақил Ўзбекистон тарихидаги ушбу муҳим сана билан муборакбод этади».

Хитой раҳбари Си Цзиньпин йўллаган мактубда шундай қайд этилади:

«Ўзбекистон Президенти Ислом Каримов Жаноби Олийларига

Президент Жаноби Олийлари!

Ўзбекистон мустақиллигининг 25 йиллиги муносабати билан Хитой халқи ва шахсан ўзим номимдан Сиз ва дўст Ўзбекистон халқига самимий табрикларим ва қизғин тилакларимни изҳор этаман.

Мустақилликнинг 25 йили давомида жаноб Президент раҳнамолигида Ўзбекистонда сиёсий барқарорлик ва жадал иқтисодий тараққиёт сақланиб, мамлакатнинг халқаро нуфузи салмоқли даражада юксалди, давлат қурилиши соҳасида ёрқин муваффақиятларга эришилмоқда. Амалиёт шуни кўрсатмоқдаки, жаноб Президент томонидан ишлаб чиқилган тараққиётнинг «ўзбек модели» мамлакатдаги реал воқеликларга мос келади ва улкан ҳаётий кучга эгадир.

Сўнгги йилларда Хитой—Ўзбекистон муносабатларида яхши ривожланиш тенденциялари сақланиб турибди ва янги стратегик даражага эришилди. Хитой ва Ўзбекистон алоқалари ривожланиб бораётгани ва ўртамиздаги самимий дўстликни юксак қадрлайман. Хитой – Ўзбекистон муносабатларида юксак самараларга эришиш ва халқларимиз фаровонлиги йўлида кенг кўламли стратегик шерикликни изчил ривожлантириш учун Сиз билан доимо барча саъй-ҳаракатларни қилишга тайёрман.

Мамлакатингизга равнақ ва юксак салоҳият, халқингизга бахт-саодат ва фаровонлик тилайман.

Президент Жаноби Олийлари, Сизга мустаҳкам соғлик ва ишларингизда муваффақият тилаб қоламан».

Шунингдек, Германия федерал президенти Йоахим Гаук, Польша президенти Анджей Дуда, БАА президенти Халифа бин Зоид Ол Наҳаён, БАА вице-президенти, бош вазири, Дубай амирлиги ҳокими Муҳаммад бин Рошид Ол Мактум, Абу-Даби валиаҳди, БАА Қуролли кучлари бош қўмондони ўринбосари Муҳаммад бин Зоид Ол Наҳаён, Жазоир президенти Абдулазиз Бутефлика, Туркманистон президенти Гурбангули Бердимуҳамедов, Тожикистон президенти Имомали Раҳмон, Озарбайжон президенти Илҳом Алиев, Беларусь президенти Александр Лукашенко, Украина президенти Пётр Порошенко, Афғонистон президенти Муҳаммад Ашраф Ғани, МДҲ ижроия қўмитаси раиси – ижрочи котиби Сергей Лебедев, Жаҳон сайёҳлик ташкилоти бош котиби Толиб Рифаи, Энергетика хартияси бош котиби Урбан Руснак, Америка—Ўзбекистон савдо палатаси раиси Кэролин Лемм, Америка—Ўзбекистон савдо палатаси президенти Стивен Надерни, «МАКСАМ» компаниясининг президенти ва ижрочи директори Хосе Фернандо Санчес-Хунко, «Хуавей Текнолоджиз Ко.Лтд» компанияси президенти Жен Чженфей, «НЕК Корпорейшн» компанияси президенти Нобухиро Эндо, Япония тиббий ускуналар соҳасида ташқи техник кўмак бўйича ташкилоти (ОМETА) раиси Кенъичи Мацумото, Германия—Ўзбекистон ишбилармонлар кенгаши ижрочи директори, «Дойче Кабел АГ Ташкент» қўшма корхонаси инвестори Фалк Порше, «Пиканол» компанияси бош ижрочи директори Люк Так, «Туркистон—Америка ассоциацияси» раиси Абдулла Хўжа, АҚШ ва Канада Бухоро яҳудийлари конгресси президенти Борис Кандов, Г.В.Плеханов номидаги Россия иқтисодиёт университетининг ректори Виктор Гришин, Марказий Осиё бўйича Кембриж форуми раиси Сиддхарт Саксена, Конрад Аденауэр номидаги жамғарманинг Марказий Осиё бўйича минтақавий ваколатли вакили Томас Кунсе, Европа Иттифоқининг Ўзбекистондаги делегацияси раҳбари Юрий Штерк ҳам ўз табрикларини йўллаган.

«Қутловлар келиши давом этмоқда», — дейилади ЎзА ахборотида.