Руминия ТИВ мамлакатга Туркиядаги Инжирлик ҳарбий базасидан АҚШ ядро қуроли олиб келиниши бошлангани ҳақидаги хабарларни рад этди. Бу ҳақда «РБК» хабар бермоқда.
«Ташқи ишлар вазирлиги мазкур маълумотни кескин рад этади», — дейилади ТИВ хабарида.
Вашингтон ва Анқара ўртасидаги муносабатлар ёмонлашгани асносида АҚШ Туркиядан Руминияга ядро қуролини олиб келишни бошлагани ҳақида икки мустақил аноним манбага таяниб, Брюсселда жойлашган Euroactiv интернет-нашри маълум қилди. Манбаларга кўра, қуролни олиб ўтиш техник ва сиёсий жиҳатдан катта муаммолар туғдиради. Бироқ АҚШ ва Туркия муносабатлари ҳарбий тўнтаришга уринишдан сўнг шунчалик кескинлашганки, энди Вашингтон бундан буёғига Анқарага қуролини сақлашни ишонмайди. Аслаҳаларни Руминиядаги Девеселу авиабазасига ташиш бошланди.
Маълумот учун, Туркиядаги Инжирлик базасида АҚШнинг 50 га яқин B61 ядро бомбаси сақланади. Ҳарбий тўнтаришга уриниш чоғи Туркия ҳукумати АҚШ авиациясига Инжирлик базасидан учиш ва қўнишни ман этди, база қўмондонини эса фитнага алоқадорликда айблади.
Изоҳ (0)