Футбол бўйича Ўзбекистон Олий Лигасининг «Андижон» клуби футболчиси 5 сентябрь куни Уэльс терма жамоасига қарши ўйинда майдонга тушиши мумкин, деб хабар берди «Championat.asia».
Гап «Андижон» сафида ҳаракат қилаётган молдовалик легионер Андрей Бугняк ҳақида бормоқда. 5 сентябрь куни Молдова терма жамоаси ЖЧ—2018 саралашининг илк учрашувини Кардиффда Уэльсга қарши ўтказади. Молдова терма жамоаси бош мураббийи Игорь Доброволский Гарет Бэйл жамоадошларига қарши ўйинда иштирок этиши мумкин бўлган футболчилар рўйхатига «Андижон» клуби вакилини ҳам киритди.
Уэльсга қарши ўйнаши мумкин бўлганлар қаторида Ўзбекистон Олий Лигасида аввал тўп сурган яна икки нафар футболчи ҳам бор. Ўз вақтида Тошкентнинг «Локомотив» ва Фарғонанинг «Нефтчи» клуби шарафини ҳимоя қилган Александр Оника, ҳамда «Локомотив»даги ўйинлари орқали танилган Андрей Кожокар ҳам Уэльсга қарши ҳаракат қилиши мумкин.
Қайд этиш керак, Уэльс терма жамоаси Евро—2016 мусобақасида ярим финалга қадар етиб борганди.
Изоҳ (0)