Жаҳон бокс кенгаши россиялик боксчи Александр Поветкинга нисбатан ҳеч қандай чекловларни қўллагани йўқ, у шунчаки унга нисбатан текширувни якунлади. Бу ҳақда спортчининг адвокати Алексей Карпенко маълум қилди, деб ёзади «Ведомости».
«Унинг дисквалификация қилингани ҳақидаги хабар қаердан пайдо бўлганини билмайман. WBC Поветкинга нисбатан суриштирувни якунлади, у дисквалификация қилинмади. Боксчи Уайлдер жароҳат олгани туфайли, Поветкин Бермейн Стиверн билан жанг ўтказади. Агар Поветкиннинг қон намунасида яна мельдоний аниқланса, ўшанда у дисквалификация қилинади», — дея аниқлик киритди адвокат.
Эслатиб ўтамиз, Уайлдер 21 май куни россиялик Александр Поветкин билан жанг ўтказиши режалаштирилганди, бироқ россиялик боксчининг организмида мельдоний қолдиқлари аниқлангани учун жанг номаълум муддатга қолдирилди. WBC Поветкинга нисбатан тергов иши давом этгунига қадар Деонтей Уалдерга ўз титулини ихтиёрий равишда ҳимоя қилиш ҳуқуқини берди.
Аввалроқ россиялик боксчининг «B» допинг намунасида 72 нанограмм, «А» намунасида 70 нанограмм мельдоний борлиги аниқланган эди.
Изоҳ (0)