Яқин кунларда Персей туркумидан Ерга юлдуз ёғилади
Ер сайёрасининг шимолий ярим шарида истиқомат қилувчилар август тунларида ғайритабиий астрономик ҳодисани — Ерга Персей юлдузлар туркумидан «юлдузлар ёмғири» ёғишини кузатиш имкониятига эга бўлади. Бу ҳақда «Вести.ru» хабар бермоқда.
Персеидлар метеор оқимининг фаоллиги 12–13 августга тўғри келади. Бу паллада одатда метеорлар сони соатига 100 тани ташкил этса, 2016 йилда бу кўрсаткич соатига 150 метеорни ташкил этади.
Метеор ёмғирини кузатиш учун ҳеч қандай махсус ускуналар талаб этилмайди.
Персеидлар осмонга кескин чизиқ тортувчи оқ метеорлардир. Энг ёрқин метеорлар ёғдуси бир неча секунд давом этади. Персеидлар метеор оқими инсониятга икки минг йилдан буён маълум. Бу ҳақда илк бор милодий 36 йилга оид Хитой солномаларида маълум қилинади.
Персеидларнинг юзага келишига сабаб Ернинг Свифт-Туттль кометаси чанг шлейфидан ўтишидир. Комета 133 йилда бир марта ўз орбитасида бир марта тўлиқ айланиб чиқади.
Ҳар сафар Қуёшга максимал даражада яқинлашганида комета эриб, унинг шлейфидаги комета зарралари кўпаяди. Бу воқеага яқин йиллар эса ерликларни «юлдузлар ёмғири» билан хурсанд қилади.
Персеидлар деган ном Персей юлдузлар туркуми номидан келиб чиққан. Метеор оқими осмон гумбазининг унга тегишли қисмидан тўкилади.
Мазкур ҳодиса ҳар йилнинг август ойида кузатилади.
