Швейцариялик Магали ва Дэвид 365 кунлик таътил олиб, Истанбулдан Сидней томон йўл олган эди. Апрель ойида йўлини бошлаган сайёҳлар июль ойининг бошида, саёҳатнинг 90-кунида Ўзбекистонга етиб келди. Бу уларнинг йўлидаги олтинчи давлат бўлди, деб маълум қилади «Газета.uz».
Жуфтлик Тошкентдан Хива, сўнг Қорақалпоғистон томон йўл олди. Навбатда Бухоро ва Самарқанд турибди.
Саёҳатлари ҳақида Магали ва Дэвид 365 Days Off номли блогида ҳикоя қилиб бормоқда. Сайтда, шунингдек, фотосуратлар ва видеопарчалар чоп этиб борилади.
Тошкентни сайёҳлар «замонавий ва тоза шаҳар» деб таърифлади, шунингдек, мамлакатга кириш улар ўйлаганчалик қийин эмаслигини тан олди.
«Ҳеч ким телефон ва ноутбуклардаги фото ва видео ёки ёнимиздаги дорилар ҳақида сўрамади», — деб ёзади сайёҳлар.
Уларга энг ёққан нарсалар Қорақалпоғистондаги қасрлар, Тошкентнинг эски қисми ва иссиқда мадор берувчи шарбат бўлди.
Хивада жуфтлик велосипедларда ҳаракатланди.
«Автомобиллар тақиқланган жойда кўпдан бери бундай маза қилмагандик», — дейилади Хивадаги велосайр видеосининг ёзма изоҳида.
Изоҳ (0)