Евро—2016. 5 та беллашувнинг бирортасида зафар қучмаган Португалия ярим финалнинг биринчи иштирокчиси

Францияда давом этаётган Европа Чемпионати чорак финалининг биринчи ўйини пенальтилар сериясига қадар етиб борди. Якунда Евро—2016 даги 5 та беллашувнинг асосий вақтида зафар қуча олмаган Португалия ярим финал чиптасига эга чиқди.

Польша ва Португалия терма жамоалари ўйинида 1:1 ҳисоби қайд этилди. Учрашувнинг 2-дақиқасида Роберт Левандовски польшаликларни ҳисобда олдинга олиб чиққан бўлса, 33-дақиқада 18 ёшли португалиялик Ренату Саншеш ҳисобни тенглаштирди.

Роберт Левандовски германиялик ҳакам Феликс Бридхнинг ўйин бошланганини билдирувчи ҳуштаги чалинганига 100 сония бўлиши билан гол уриб, Европа Чемпионатлари тарихида урилган энг тезкор иккинчи гол муаллифига айланди.

1:1 ҳисобидан кейин асосий ва қўшимча вақтларда бошқа гол урилмади ва ғолиб пенальтилар сериясида аниқланадиган бўлди. Польша нимчорак финалда ҳам пенальтилар сериясига қадар етиб борган бўлса, Португалия 117-дақиқадаги гол эвазига чорак финалга қадам қўйганди.

Пенальтилар сериясида омад португалиялик футболчиларга кулиб боқди. Улар 5 та зарбанинг барчасини аниқ амалга оширди. Хорватия билан ўйиндаги ягона голни урган Рикарду Куарежманинг сўнгги зарбаси Португалияни финал остонасига олиб чиқди.

Мағлуб терма жамоаси сафидан эса Евро—2016 да Польша учун энг кўп гол урган Якуб Блашиковскининг зарбаси ноаниқ чиқди.

[wpse_match id="371789" show_title=1]