Fransiyada davom etayotgan Yevropa Chempionati chorak finalining birinchi o‘yini penaltilar seriyasiga qadar yetib bordi. Yakunda Yevro—2016 dagi 5 ta bellashuvning asosiy vaqtida zafar qucha olmagan Portugaliya yarim final chiptasiga ega chiqdi.
Polsha va Portugaliya terma jamoalari o‘yinida 1:1 hisobi qayd etildi. Uchrashuvning 2-daqiqasida Robert Levandovski polshaliklarni hisobda oldinga olib chiqqan bo‘lsa, 33-daqiqada 18 yoshli portugaliyalik Renatu Sanshesh hisobni tenglashtirdi.
Robert Levandovski germaniyalik hakam Feliks Bridxning o‘yin boshlanganini bildiruvchi hushtagi chalinganiga 100 soniya bo‘lishi bilan gol urib, Yevropa Chempionatlari tarixida urilgan eng tezkor ikkinchi gol muallifiga aylandi.
1:1 hisobidan keyin asosiy va qo‘shimcha vaqtlarda boshqa gol urilmadi va g‘olib penaltilar seriyasida aniqlanadigan bo‘ldi. Polsha nimchorak finalda ham penaltilar seriyasiga qadar yetib borgan bo‘lsa, Portugaliya 117-daqiqadagi gol evaziga chorak finalga qadam qo‘ygandi.
Penaltilar seriyasida omad portugaliyalik futbolchilarga kulib boqdi. Ular 5 ta zarbaning barchasini aniq amalga oshirdi. Xorvatiya bilan o‘yindagi yagona golni urgan Rikardu Kuarejmaning so‘nggi zarbasi Portugaliyani final ostonasiga olib chiqdi.
Mag‘lub terma jamoasi safidan esa Yevro—2016 da Polsha uchun eng ko‘p gol urgan Yakub Blashikovskining zarbasi noaniq chiqdi.
[wpse_match id="371789" show_title=1]
Izoh (0)