Сурхондарё вилояти Божхона бошқармаси 82,2 миллион сўмлик тарихий тангаларнинг чегарадан олиб ўтилишининг олдини олди

Сурхондарё вилояти Божхона бошқармаси ходимлари Ўзбекистон ҳудудидан ноёб ва маданий бойликларни олиб ўтиш тартибини бузган қоидабузарлик ҳолатларини аниқлади. Бу ҳақда «Дарё»га мазкур бошқарма ахборот хизмати хабар берди.

Тожикистондан Ўзбекистонга «Сариосиё» чегара божхона комплекси орқали автотранспорт воситасида кириб келган фуқаро йўловчи божхона декларациясини тўлдирар экан, ёнидаги барча буюмларни декларацияда қайд этганини маълум қилди. Шунингдек, божхоначиларнинг оғзаки сўрови пайтида ҳам ёнида ортиқча буюмлари йўқлигини қайта-қайта таъкидлади.

Шундан сўнг, унга тегишли автотранспорт воситаси ўрнатилган тартибда ва холислар иштирокида кўздан кечирилганда, машина салонига 20 дона қадимий танга яширилганлиги маълум бўлди. Яширин тарзда олиб ўтишга уриниш чоғида фош қилинган ушбу тангалар Сурхондарё вилояти бадиий экспертиза мутахассисларининг хулосасига кўра, милоддан аввалги IV-III, милодий I-III ҳамда XIII-XIV асрларга оид бўлиб, уларнинг ҳозирги қиймати 12,2 миллион сўмга баҳоланган. Давлат эгалигига ўтказилган мазкур тангалар Сурхондарё вилояти археология музейи фондидан жой олди.

Термиз аэропортида ҳам божхоначилар 26 дона тарихий танганинг яширин равишда олиб чиқилишини бартараф этди. Ушбу вилоятда истиқомат қилувчи фуқаро Москвага йўл олар экан, ўзи билан степлер – канцелярия буюмини ҳам олиб кетаётганлиги бир қарашда шубҳали туюлди. Ушбу шахсга тегишли юкларни назорат-рентген аппаратидан ўтказиш вақтида, степлер тасвирининг экранда шубҳали акс этиши божхоначиларни ушбу буюмни синчиклаб текширишга ундади.

Натижада, степлер ичига турли тасвирлар туширилган ва ҳар хил ҳажмдаги 26 дона қадимий танга яширилганлиги аниқланди. Сурхондарё вилояти бадиий экспертизаси хулосасига кўра, мазкур мис ва кумушдан ишланган тангалар тарихда Ўзбекистон ҳудудида вужудга келган Кушон, Юнон-Бақтрия, Қорахонийлар, Араб халифалиги ва Бухоро хонлиги давлатларида муомалада бўлган. Уларнинг бугунги кундаги қиймати экспертлар томонидан 70 миллион сўмга баҳоланган.

Ҳозирда мазкур ҳолат юзасидан божхона текширувлари ва суриштирув жараёнлари давом этмоқда.