Жорий йилнинг 25 июнь куни Умра амалини бажариш учун Жидда шаҳрига етиб келган ўзбекистонлик зиёратчиларни Ўзбекистон мусулмонлари идорасининг ҳамкори «ал-Ҳидоя» ширкати раҳбарияти ва ишчи гуруҳлари кутиб олди. Бу ҳақда Дин ишлари бўйича қўмита матбуот хизмати хабар берди.
Зиёратчилар шу кунинг ўзида сўнгги русумдаги замонавий автобусларда Мадинаи Мунаввара зиёратига йўл олди, у ерда зиёратчилар Муҳаммад (с.а.в.)нинг масжидларидан 150 метр масофадаги «Нур Мавадда» меҳмонхонасига жойлашди. Мазкур меҳмонхонанинг ҳар бир хонаси кондиционер, музлатгич ва бошқа техника воситалари билан жиҳозланган бўлиб, алоҳида ювиниш хоналари мавжуд.
Ишчи гуруҳи таркибидаги ошпазлар томонидан зиёратчилар учун ўзбек миллий таомларидан саҳарлик ва ифторликлар ҳозирланмоқда. Меҳмонхонада эркаклар ва аёллар учун алоҳида тиббиёт марказлари ташкил этилган бўлиб, мурожаат этишни истаган умрачиларга тиббий ёрдам шу ернинг ўзида кўрсатилиши имконияти тўла таъминланган.
Мадинада зиёратчилар бир қанча муқаддас қадамжоларга ҳам бориши режалаштирилган. Қиблатайн, Қубо масжидлари, Уҳуд тоғи ва бошқа масканлар зиёрати шулар жумласидандир.
Зиёратчилар Мадинаи Мунавварада уч кун бўлгач, Макка сари йўлга чиқади.
Изоҳ (0)