Surxondaryo viloyati Bojxona boshqarmasi 82,2 million so‘mlik tarixiy tangalarning chegaradan olib o‘tilishining oldini oldi

Surxondaryo viloyati Bojxona boshqarmasi xodimlari O‘zbekiston hududidan noyob va madaniy boyliklarni olib o‘tish tartibini buzgan qoidabuzarlik holatlarini aniqladi. Bu haqda “Daryo”ga mazkur boshqarma axborot xizmati xabar berdi.

Tojikistondan O‘zbekistonga “Sariosiyo” chegara bojxona kompleksi orqali avtotransport vositasida kirib kelgan fuqaro yo‘lovchi bojxona deklaratsiyasini to‘ldirar ekan, yonidagi barcha buyumlarni deklaratsiyada qayd etganini ma’lum qildi. Shuningdek, bojxonachilarning og‘zaki so‘rovi paytida ham yonida ortiqcha buyumlari yo‘qligini qayta-qayta ta’kidladi.

Shundan so‘ng, unga tegishli avtotransport vositasi o‘rnatilgan tartibda va xolislar ishtirokida ko‘zdan kechirilganda, mashina saloniga 20 dona qadimiy tanga yashirilganligi ma’lum bo‘ldi. Yashirin tarzda olib o‘tishga urinish chog‘ida fosh qilingan ushbu tangalar Surxondaryo viloyati badiiy ekspertiza mutaxassislarining xulosasiga ko‘ra, miloddan avvalgi IV-III, milodiy I-III hamda XIII-XIV asrlarga oid bo‘lib, ularning hozirgi qiymati 12,2 million so‘mga baholangan. Davlat egaligiga o‘tkazilgan mazkur tangalar Surxondaryo viloyati arxeologiya muzeyi fondidan joy oldi.

Termiz aeroportida ham bojxonachilar 26 dona tarixiy tanganing yashirin ravishda olib chiqilishini bartaraf etdi. Ushbu viloyatda istiqomat qiluvchi fuqaro Moskvaga yo‘l olar ekan, o‘zi bilan stepler – kanselyariya buyumini ham olib ketayotganligi bir qarashda shubhali tuyuldi. Ushbu shaxsga tegishli yuklarni nazorat-rentgen apparatidan o‘tkazish vaqtida, stepler tasvirining ekranda shubhali aks etishi bojxonachilarni ushbu buyumni sinchiklab tekshirishga undadi.

Natijada, stepler ichiga turli tasvirlar tushirilgan va har xil hajmdagi 26 dona qadimiy tanga yashirilganligi aniqlandi. Surxondaryo viloyati badiiy ekspertizasi xulosasiga ko‘ra, mazkur mis va kumushdan ishlangan tangalar tarixda O‘zbekiston hududida vujudga kelgan Kushon, Yunon-Baqtriya, Qoraxoniylar, Arab xalifaligi va Buxoro xonligi davlatlarida muomalada bo‘lgan. Ularning bugungi kundagi qiymati ekspertlar tomonidan 70 million so‘mga baholangan.

Hozirda mazkur holat yuzasidan bojxona tekshiruvlari va surishtiruv jarayonlari davom etmoqda.