Ўзбекистонда «Фавқулодда ҳолат тўғрисида»ги қонун қабул қилинади: унинг лойиҳаси муҳокама учун Ягона интерактив давлат хизматлари порталига жойлаштирилди. Бу ҳақда «Газета.uz» хабар бермоқда.
Қонунга кўра, фавқулодда ҳолат тасдиқлаш учун уч сутка мобайнида Олий Мажлис палаталарига киритиладиган ва зудлик билан ОАВда чоп этилиши лозим бўлган Президент фармони билан бутун мамлакат бўйлаб ёки унинг айрим ҳудудларида жорий этилади. Парламент томонидан тасдиқланмаган фармон уч сутка ўтгач ўз кучини йўқотади ва бу ҳақда аҳоли хабардор қилинади.
Фавқулодда ҳолат жорий этилишига сабаб бўлувчи омиллар қаторига аниқ ташқи хавф, конституцион тузумга таҳдид, қуролли исён, оммавий тартибсизликлар, терактлар, ўта муҳим ёки тоифали объектлар, алоҳида манзиллар қамал қилиниши ёки қўлга олиниши, ноқонуний қуролли тузилмалар тайёргарлиги ва фаолияти, фуқаролар хавфсизлиги ва ҳаёти, давлат идоралари ишига таҳдид солувчи миллатлараро, динлараро ва чегара можаролари, шунингдек, табиий, техноген ва экологик кўринишдаги фавқулодда вазиятларни киритиш таклиф этилган.
Мамлакат ҳудудида жорий этиладиган фавқулодда ҳолатнинг амал қилиш муддати 30, унинг айрим қисмларида эса 60 суткадан ошиши мумкин эмас. Зарурат туғилган тақдирда мазкур муддат давлат раҳбарининг навбатдаги фармони билан (у ҳам Олий Мажлис томонидан тасдиқланиши лозим) узайтирилиши мумкин.
Изоҳ (0)