«5-студия» Ёшлар ижодий тажриба уюшмаси томонидан «Зумраша» ҳажвий болалар киножурналининг янги — 3 ва 4-сонларини тасвирга олиш ишлари якунига етди, дея хабар бермоқда «Ўзбеккино» миллий агентлиги матбуот хизмати.
Навбатдаги тўпламда «Қачон кетасизлар?», «Антиқа ит», «Ёлғоннинг миси чиқди» ҳамда «Бир сўзли йигит» номли ҳажвий сюжетлар суратга олинди. Жумладан, Сарвар Каримов режиссёрлигида тайёрланган «Бир сўзли йигит» сюжети XIX аср қаҳрамонлари — Дон Адизо ва Акбариттоларнинг Техасдаги саргузаштлари ҳақида ҳикоя қилади.
Унда бир қўли йўқ собиқ шериф Дон Адизо мексикалик ёлланма қотил Акбаритто билан тил бириктириб, чероки ҳинду қабиласининг хазиналарини излаш йўлида турли вазиятларга тушиб қолади.
«Зумраша» киножурналининг мазкур тўпламида Тўхтамурод Азизов, Зуҳра Солиева, Адиз Ражабов, Акбархўжа Расулов, Асқар Ҳикматов, Камрон Саидмуродов каби ижодкорлар иштирок этган.
Маълумот ўрнида, «Зумраша» киножурналининг янги сонларига 3—5 дақиқалик ҳажвий сюжетлар учун сценарийлар қабул қилинмоқда. Сценарийларни studia5@uzbekkino.uz электрон почта манзилига кўриб чиқиш учун юбориш мумкин.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)