“5-studiya” Yoshlar ijodiy tajriba uyushmasi tomonidan “Zumrasha” hajviy bolalar kinojurnalining yangi — 3 va 4-sonlarini tasvirga olish ishlari yakuniga yetdi, deya xabar bermoqda “O‘zbekkino” milliy agentligi matbuot xizmati.
Navbatdagi to‘plamda “Qachon ketasizlar?”, “Antiqa it”, “Yolg‘onning misi chiqdi” hamda “Bir so‘zli yigit” nomli hajviy syujetlar suratga olindi. Jumladan, Sarvar Karimov rejissorligida tayyorlangan “Bir so‘zli yigit” syujeti XIX asr qahramonlari — Don Adizo va Akbarittolarning Texasdagi sarguzashtlari haqida hikoya qiladi.
Unda bir qo‘li yo‘q sobiq sherif Don Adizo meksikalik yollanma qotil Akbaritto bilan til biriktirib, cheroki hindu qabilasining xazinalarini izlash yo‘lida turli vaziyatlarga tushib qoladi.
“Zumrasha” kinojurnalining mazkur to‘plamida To‘xtamurod Azizov, Zuhra Soliyeva, Adiz Rajabov, Akbarxo‘ja Rasulov, Asqar Hikmatov, Kamron Saidmurodov kabi ijodkorlar ishtirok etgan.
Ma’lumot o‘rnida, “Zumrasha” kinojurnalining yangi sonlariga 3—5 daqiqalik hajviy syujetlar uchun ssenariylar qabul qilinmoqda. Ssenariylarni studia5@uzbekkino.uz elektron pochta manziliga ko‘rib chiqish uchun yuborish mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)