АҚШ мезбонлик қилаётган футбол бўйича Америка Кубоги–2016 турнирининг «D» гуруҳи иккинчи туридан ўрин олган учрашувлар ўз якунига етди. Унга кўра, Аргентина терма жамоаси муддатидан аввал плей-офф йўлланмасига эга бўлди.
Дастлабки ўйинда Чили терма жамоаси қийинчилик билан Боливияни 2:1 ҳисобида мағлубиятга учратди. Ўйиннинг 46-дақиқасида Артуро Видаль ҳисобни очган бўлса, 61-дақиқада Кампос жарима зарбасини аниқ амалга ошириб, мувозанатни тиклади. Артуро Видаль ҳакам томонидан ўйинга қўшиб берилган вақтнинг 10-дақиқасида пенальтидан унумли фойдаланиб, Чили терма жамоасига ғалаба келтирган гол муаллифи бўлди.
Шундай қилиб, Чили терма жамоаси қимматли уч очкога эга бўлди ва плей-офф баҳслари учун курашни давом эттиради. Ҳар икки ўйинда мағлубиятга учраган Боливия терма жамоаси мусобақа билан хайрлашди.
Гуруҳнинг иккинчи ўйинида Аргентина терма жамоаси 31-дақиқадан бошлаб бир киши кам бўлиб ҳаракат қилган Панамани 5:0 ҳисобида мағлубиятга учратди. 61-дақиқада захирадан майдонга тушган Лионель Месси хет-трик қайд этган бўлса, Николас Отаменди ва Серхио Агуэро биттадан гол киритди. Шундай қилиб, 6 очко тўплаган ҳолда Аргентина плей-офф босқичига муддатидан аввал йўлланма олди.
Ҳисобида 3 очко мавжуд бўлган Панама терма жамоаси сўнгги турда худди шунча очкога эга бўлган Чили билан юзма-юз келади. Бўлажак баҳсда иккинчи плей-офф йўлланмаси ҳал бўлади.
Америка Кубоги–2016«D» гуруҳи, 2-тур11 июнь, шанба
Чили – Боливия 2:1 (0:0, 2:1)
Голлар: 1:0 – 46 Видаль, 1:1 – 61 Кампос, 2:1 – 90+10, пенальти Видаль.Аргентина – Панама 5:0 (1:0, 4:0)
Голлар: 1:0 – 7 Отаменди, 2:0 – 68 Месси, 3:0 – 78 Месси, 4:0 – 87 Месси, 5:0 – 90 Агуэро.Аргентина – Ромеро, Отаменди, Рохо, Меркадо, Фунес Мори, Фернандес (Месси, 61), Маскерано, Банега, Гайтан, Ди Мария (Ламела, 43), Игуаин (Агуэро, 76).
Четлатиш: Годой (31).
Изоҳ (0)