Қочқинлар сафидан чиққан ўн нафар спортчи Рио-де-Жанейрода ўтадиган 2016 йилги Ёзги Олимпиадада Халқаро олимпия қўмитаси байроғи остида иштирок этади. Бу ҳақда, ташкилот президенти Томас Бахнинг баёнотига асосланиб, «Интерфакс» хабар бермоқда.
«Бу қочқинларнинг уйи ҳам, жамоаси ҳам, байроғи ҳам, миллий мадҳияси ҳам йўқ. Биз уларга Олимпия қишлоғидан, бошқа спортчилар ёнидан уй таклиф қиламиз. Олимпия мадҳияси уларнинг мадҳиясига, Олимпия байроғи уларнинг байроғига айланади. Бу жамоа дунёдаги барча қочқинлар учун умид рамзига айланади ва барчамизни муаммонинг кўлами ҳақида ўйлаб кўришга мажбур этади», — деди Бах қўмитанинг штаб-квартирасида ўтказилган матбуот анжуманида.
Бошқа барча жамоаларда бўлганидек, қочқин спортчилар жамоаси ҳам техник таъминот штатига, шу жумладан, беш мураббий ва беш расмий вакилга эга бўлади.
Жамоа таркиби қуйидагича:
Рами Анис (Сурия) — сузиш;
Йех Пур Биль (Жанубий Судан) — енгил атлетика, 800 метрга югуриш;
Жеймс Ньянг Чиенжек (Жанубий Судан) — енгил атлетика, 400 метрга югуриш;
Йонас Кинге (Эфиопия) — енгил атлетика, марафон;
Анжелина Нада Лохалит (Жанубий Судан) — енгил атлетика, 1500 метрга югуриш;
Роза Натике Локоньен (Жанубий Судан) — енгил атлетика, 800 метрга югуриш;
Пауло Амотун Локоро (Жанубий Судан) — енгил атлетика, 1500 метрга югуриш;
Иоланда Букаса Модика (Конго Демократик Республикаси) — дзюдо, 70 килограммгача вазн тоифаси;
Юсра Мардиний (Сурия) — сузиш;
Пополе Мисенга (Конго Демократик Республикаси) — дзюдо 90 килограммгача вазн тоифаси.
Терма жамоа раҳбари — машҳур кениялик спринтер аёл, учта Олимпиада иштирокчиси Тегла Лорупе. Жамоа «Олимпия бирдамлиги» жамғармаси томонидан молиялаштирилади.
Изоҳ (0)