Қашқадарё вилояти Китоб туманидаги «Ёш алангачи» болалар соғломлаштириш оромгоҳида умумтаълим мактаблари ўқувчилари ўртасида «Ёш қутқарувчи» мусобақасининг мамлакат босқичи бўлиб ўтди, дея хабар бермоқда ЎзА.
ЮНИСЕФнинг Ўзбекистондаги ваколатхонаси матбуот хизмати хабарига кўра, мазкур тадбир болалар ва ёшларнинг турли табиий офатлар олдидаги қатъияти ва тегишли жавоб чораларини кўришга тайёрлигини намоён этди.
«Ёш қутқарувчи кўнгиллилар клублари ёшлар жисмоний жиҳатдан кучли бўлишига, фавқулодда вазиятларда хатарларни камайтириш бўйича назарий ва амалий билимларини оширишига ёрдам беради», — деди Фавқулодда вазиятлар вазирининг биринчи ўринбосари Комилжон Арипов. Шунингдек, у мусобақанинг маҳаллий ва ҳудудий босқичларида умумтаълим мактабларидан жами 25 минг нафар ўқувчилар жалб этилганини айтиб ўтди.
Фавқулодда вазиятлар вазирлиги, Халқ таълими вазирлиги ва «Камолот» Ёшлар ижтимоий ҳаракати томонидан ташкил этилган тадбирни ўтказишда ЮНИСЕФ амалий ёрдам кўрсатди. Тадбирда турли мактаблар ўқувчилари иштирок этиб, офатлар эҳтимолига қанчалик тайёр эканликларини намоён қилди.
Изоҳ (0)