Россияда аёллар эркакларга қараганда 1,5 баробар кўпроқ онлайн-тўловларни амалга оширади

Аёллар эркакларга қараганда 1,5 баробар кўпроқ онлайн-тўловларни амалга оширади. Бу ҳақда, «Яндекс.Денги» портали тадқиқоти маълумотига таяниб, «ТАСС» хабар бермоқда.

Қолаверса аёллар бир марталик тўлов учун 15 фоизга кўпроқ маблағ сарфлайди.

Агар фойдаланувчиларни машғулот турига қараб таққосласа, бир марталик онлайн-тўлов учун энг кўп — 1 331 рублни офис ходимлари сарфлаши аниқланди. Уй бекалари ва бошқа ишламайдиган фойдаланувчиларнинг ўртача чеки 947 рублни, талабаларники эса 753 рублни ташкил этади. Офисда ишловчилар таҳсил олувчилар ёки ишсизларга қараганда икки карра кўпроқ онлайн-тўловларни амалга оширади.

iOS смартфон ва планшетлари соҳибларининг ўртача тўлови Android қурилмаларини танлаганларга нисбатан 21 фоизга ортиқдир. Бу кўрсаткич тегишли равишда 1 275 ва 1 053 рублни ташкил этади.

Тадқиқот 2016 йилнинг баҳор фаслида ўтказилган. Унда тасодифан танланган беш миллион электрон ҳамён соҳиблари тўловлари ўрганилган.