Наманганда Шарқий ҳарбий округ ҳарбийлари оилаларига янги хонадонлар топширилди
Наманган вилоятида жойлашган ҳарбий шаҳарчалардан бирида бунёд этилган кўп қаватли турар-жой хонадонларининг калити Шарқий ҳарбий округ қўшинларида хизмат қилаётган ҳарбий хизматчилар оилаларига топширилди. Бу ҳақда ЎзА хабар бермоқда.
«Фойдаланишга топширилган 32 хонадондан иборат тўрт қаватли турар-жой биноси ҳарбий қисм хизматчилари учун барпо этилган учинчи бино бўлиб, уларнинг атрофида яратилган инфратузилма объектлари ўзаро уйғунлашиб, замонавий шаҳарча қиёфасини касб этди.
Уй фаровон ҳаёт кечириш учун зарур барча шароитлар, инфратузилма тармоқлари билан таъминланган, маиший рўзғор буюмлари билан жиҳозланган. Ҳовлидаги болалар ўйин ва спорт майдончалари ўсиб келаётган ёш авлоднинг соғлом вояга етишига хизмат қилади», — дейилади ЎзА хабарида.
