Темур Исмоилов Андижондаги халқаро теннис турнирининг ярим финал йўлланмасини қўлга киритди

Ўзбекистонлик теннисчи Темур Исмоилов Андижон шаҳрида давом этаётган, мукофот жамғармаси 25 минг долларга тенг ITF туркумидаги теннис турнирининг ярим финалчисига айланди.

Халқаро теннис федерацияси расмий сайтининг маълум қилишича, мазкур турнирда иккинчи рақам остида таснифланган 21 ёшли Ўзбекистон вакили чорак финалда индонезиялик Кристофер Рунгкатга қарши баҳс олиб борди ва 6:3, 6:0 ҳисобида муваффақиятга эришди.

Бунга қадар Исмоилов ҳамюрти Аброр Исоқовни 6:2, 6:3 ҳамда россиялик Денис Мацукевични 6:4, 2:6, 6:4 ҳисобида таслим қилганди. Ярим финалда ўзбекистонлик теннисчи ҳиндистонлик Срирам Балажи билан куч синашади.

Чорак финалда иштирок этган бошқа бир ўзбекистонлик теннисчи – Санжар Файзиев Хитой Тайпейи вакили Ти Ченга қарши кортга чиқиб, 3:6, 6:3, 4:6 ҳисобида имкониятни бой берди турнирдаги иштирокини якунлади.