Ўзбекистон меҳнат вазири Жанубий Корея атроф-муҳит ва меҳнат қўмитаси раҳбарини қабул қилди
Ўзбекистон Республикаси меҳнат вазири Азиз Абдуҳакимов 24 май куни Корея Республикаси Миллий Ассамблеясининг атроф-муҳит ва меҳнат қўмитаси раиси Ким Ёнг Жо хоним бошчилигидаги делегация билан учрашди. Бу ҳақда «Дарё»га Меҳнат вазирлигининг матбуот хизмати маълумот берди.
Вазир ўз кириш сўзида Ўзбекистон ҳукумати томонидан аҳоли бандлигини таъминлаш, меҳнат ҳуқуқи муҳофазасини кучайтириш ва муносиб меҳнат шароитини яратиш масаласига давлат сиёсати даражасида эътибор қаратилаётганини таъкидлади. Шунингдек, меҳнат вазири парламент, вилоят ва туман ҳокимликлари мисолида Ўзбекистонда гендер тенгликни таъминлаш масаласи ижобий ечимини топиши натижасида хотин-қизлар тенг ҳуқуқ асосида меҳнат фаолияти юритаётганига алоҳида урғу берди.
Ўз навбатида, делегация вакиллари йиғилганларга ташрифларининг мақсади, шунингдек, Миллий Ассамблея фаолияти хусусида сўзлар экан, Ўзбекистоннинг бой маданияти ва маънавий мероси кореяликлар томонидан юксак даражада қадрланиши ҳамда Ўзбекистонни Марказий Осиё ҳудудидаги стратегик ҳамкор сифатида тан олишларини қайд этди.
Учрашувда томонлар яқин истиқболда ҳамкорликни янада мустаҳкамлаш юзасидан фикр алмашди. Жумладан, меҳнат миграцияси, касбга қайта тайёрлаш тизимини ташкил этиш ва Корея тажрибаси асосида аҳоли бандлигини таъминлаш ишларини такомиллаштиришда ҳамкорлик қилишга келишиб олинди.
