АҚШ махсус хизматлари бугун, 19 май куни Греция ҳудудида ҳалокатга учраган, Мисрнинг EgyptAir компаниясига тегишли лайнер бортида теракт содир этилганини истисно қилмаяпти. Бу ҳақда, CBS радиосига таяниб, «ТАСС» хабар бермоқда.
Айтилишича, АҚШ разведкаси охирги 90 кунга дахлдор мавжуд ахборотни текширмоқда, шунингдек, чет эллик ҳамкасблар билан фожиани тафтиш этишнинг асосий йўналишларини муҳокама қилмоқда.
Президент Барак Обама ҳукумат идораларига фожиа билан боғлиқ равишда Франция ва Мисрга тегишли ёрдам кўрсатиш ҳақида кўрсатма берди.
Илгарироқ очиқ денгиздан лайнерга оид деб тахмин қилинаётган иккита бўлак топилганихабар қилинган эди.
Париждан Қоҳирага учаётган самолёт Греция ҳаво ҳудудига киргандан 20 дақиқа ўтиб, радарлардан ғойиб бўлди. MS804 рейси бортида 56 нафар йўловчи (улардан уч нафари бола) ва ўн нафар экипаж аъзоси бор эди. Уларнинг тақдири ҳозирча номаълум.
«Маядин» телеканали, EgyptAir авиакомпаниясидаги манбасига таяниб, самолёт Ўрта Ер денгизига қулаганини билдирганди.
Миср фуқаролик авиацияси вазирлиги EgyptAir компаниясининг A320 самолёти ҳалокатга учраганини расман тасдиқлади.
Изоҳ (0)