Ҳиндистонда ҳарорат 50,5 даражадан ошди, беш штатда фавқулодда вазият эълон қилинди
Ҳиндистон шимолида кунлик ҳарорат Цельсий бўйича 50,5 даражага етди, беш штатда фавқулодда вазият эълон қилинди. Бу ҳақда 19 май, пайшанба куни мамлакат метеорология департаменти маълум қилди, дея хабар беради «ТАСС».
18 май, чоршанба куни Рожастон штатининг Пхалоди шаҳрида 50,5 даража ҳарорат қайд этилган, бу Ҳиндистон об-ҳаво кузатувлари тарихидаги мутлоқ рекорддан атиги 0,1 даражага кам.
«1956 йили шу штатнинг Алвар шаҳрида Цельсий бўйича 50,6 даража ҳарорат кузатилган, — дея таъкидлаган департамент директори Брахма Пракаш Ядав. — Бироқ яқин кунларда Шимолий, Ғарбий ва Марказий Ҳиндистонда ҳарорат фақат кўтарилиб боради, шу боис мазкур рекорд забт этилиши мумкин».
Юзага келган вазиятдан келиб чиқиб, Ҳиндистон табиий офатлар оқибатларини бартараф этиш миллий бошқармаси Харьяна, Рожастон, Гужарот, Мадхья-Прадеш штатлари ва Деҳли иттифоқдош ҳудудида фавқулодда вазият эълон қилди.
