Испания фуқароси Висенте Эгурсегуи Ортис Twitter микроблогида қирол Филипп VI га ўлим тиланган изоҳни чоп этгани учун бир ярим йиллик қамоқ жазосига ҳукм қилинди. Бу қарорни Испания Миллий суд коллегияси 17 март, сешанба куни қабул қилди, деб хабар бермоқда «ТАСС».
Даставвал прокуратура унга икки йиллик мухлат сўраётганди, аммо фуқаро айбини тан олгани боис жазо муддати бир ярим йилга қисқартирилди.
2014 йилнинг 20 майида Ортис ижтимоий тармоққа дафн транспорти расмини жойлаштириб, «Бу биз қиролнинг дебютини кўришни истаганимиз ягона Mercedes’дир», деб ёзди.Шунингдек, у АҚШ президенти Жон Кеннедининг ўлдирилиши акс этган видеолавҳа остига «Летисия (қиролнинг рафиқаси) янги Жаклин Кеннеди бўлиши мумкин», — деган изоҳ қолдирди.
Шунингдек, Висенте Эгурсегуи Ортис мунтазам равишда Испания шимоли ҳамда Франция жануби-ғарбидаги ерларни қамраб олувчи Басклар ўлкаси мустақиллиги учун курашаётган ЭТА («Эускади та аскатасуна» — «Басклар ўлкаси ва озодлик») айирмачи ташкилотини кўкка кўтариб хабарлар ёзар ва фотосуратлар чоп этарди.
ЭТА террорчи ташкилотига 1959 йилда асос солинган эди. Шу пайтга қадар гуруҳ жангарилари уюштирган терактларда 800 киши ҳалок бўлди.