Фаластин Маҳбуслар жамияти Исроил ҳибсхоналарида 53 нафар фаластинлик журналист сақланаётганини маълум қилди. Бу ҳақда Al Jazeera нашри хабар берган.
Фаластинлик Маҳбуслар жамияти 3 май — Жаҳон матбуот эркинлиги куни муносабати билан журналистлар ҳибсга олинишига алоқадор янги статистикани эълон қилган. Статистикада Ғазо уруши бошланганидан бери ҳибсга олинган фаластинлик мухбирлар сони умумлаштириб берилган.
Журналистларнинг 43 нафари 7 октябрь воқеалари ортидан ҳибсга олинган. Шунингдек, 4 нафар журналист ҳақида ҳеч қандай маълумот йўқ. На Исроил расмийлари ва на бошқа ташкилотлар улар ҳақида маълумот топа олмаган.
“Фаластинлик журналистларни нишонга олиш Исроил ўз тарихи давомида олиб борган энг муҳим сиёсатлардан бири бўлган ва шундай бўлиб қолади”, — дейилган Фаластин Маҳбуслар жамияти хабарида.
Ҳужум остидаги Ғазода фаолият олиб бораётган бир қанча Яқин Шарқ нашрлари ходимлари журналистларга нисбатан содир этилаётган таҳдид ва зўравонликлар ҳақида хабар берган. Исроил ҳукумати ва мудофаа кучлари раҳбарияти бу айбловларни рад этган.
Изоҳ (0)