Андижонда Ўзбекистондаги биринчи эчкичилик фермаси иш бошлайди

Андижон вилоятининг Олтинкўл туманидаги «Бахт Имкон Ривож Чорваси» фермер хўжалигида Ўзбекистондаги биринчи эчкичилик фермаси иш бошлаш арафасида. Бу ҳақда «Газета.uz» хабар бермоқда.

Ферма учун бино қуриш ишлари охирига етмоқда. Фермер хўжалиги раҳбари Фахриддин Исмоилов айни пайтда Германияда бўлиб, 1000 та эчки ва шунча мол сотиб олиш юзасидан музокаралар олиб бормоқда.

Ўзбекистонда эчки сутини истеъмол этишни хуш кўрадиганлар ва бу жониворлар боқиладиган хўжаликлар кўп, бироқ шу пайтгача эчки сутини саноат кўламида ишлаб чиқарадиган йирик хўжаликлар йўқ эди.

Бундан ўн йил аввал фаолиятини бошлаган «Бахт Имкон Ривож Чорваси» вилоятдаги пешқадам фермер хўжаликларидан бири бўлиб, ҳозирда 1000 дан ортиқ йирик шохли молга эга. Улардан 600 таси кунига ўртача 20—22 литр сут беради. «Nestle Ўзбекистон» компанияси томонидан ҳар куни олинадиган сутнинг чорак қисми ушбу фермер хўжалиги ҳиссасига тўғри келади.