2016 йил 28 апрель куни Алишер Навоий номидаги Ўзбекистон Миллий кутубхонаси анжуманлар залида Ўзбекистонда интернет журналистика ривожининг долзарб масалаларига бағишланган Талабаларнинг еттинчи анъанавий медиаконференцияси бўлиб ўтди.
Тадбир ташкилотчиси – Мирзо Улуғбек номидаги Ўзбекистон Миллий университети журналистика факультети «Услубият, таҳрир ва Интернет журналистика» кафедраси.
Ҳамкорлар – Алишер Навоий номидаги Ўзбекистон Миллий кутубхонаси, DEKOS компанияси.
Талабаларнинг Анъанавий медиаконференцияси – талаба ёшларнинг ахборот-коммуникация технологиялари ҳамда интернет журналистика соҳалари тажрибали мутахассислари билан ўзаро фикр алмашиши, замонавий журналистика ва медиа тизимининг муаммолари юзасидан ўз нуқтаи назарини билдириши учун қулай имконият. Шунингдек, мазкур тадбир ёш тадқиқотчиларнинг келгусида миллий Интернет журналистика амалиёти ва назарий асосларини янада ривожлантириш йўлида қўйган дастлабки қадами ҳамдир.
Миллий ахборот кенглигининг глобал тармоқ бўлагига айланганига 20 йил бўлди. Бироқ мана шу қисқа муддат ичида Интернет аудиторияси геометрик прогрессия бўйича кенгайиб борди. Бугунги кунда Ўзбекистонда 10 миллиондан ортиқ интернет фойдаланувчиси мавжуд. Бу мамлакат аҳолисининг 1/3 қисми демакдир.
Ижтимоий медиа ресурслари фойдаланувчиларининг бу қадар шиддат билан ўсиши уларнинг бугунги кунда PR ва маркетинг соҳасининг муҳим инструментлари сифатида тан олинишига олиб келди. Социал медиа – миллионлаб, ҳатто миллиардлаб инсонларни бирлаштиришга қодир виртуал майдон. Унинг мана шу интегратив имкониятидан унумли фойдаланиш, ижтимоий медиа тараққиёти самараси ўлароқ вужудга келган янги технологияларни ўрганиш ва уларни амалиётга татбиқ этиш давр талаби. Ана шундай янги ҳодисалардан бири – краудсорсинг ва краудфандинг технологияларидир.
Бу йилги, VII медиаконференция иштирокчилари ушбу технологиялар мазмун-моҳияти, уларни ОАВ фаолиятига жорий қилиш масалалари хусусида ўз мулоҳаза ва таклифларини билдирди.
Одатдагидек, конференция спикерлари ҳам, модераторлари ҳам – талаба ёшлар. Бу гал улар тажрибали журналистлар Медиконференциянинг барча иштирокчилари ҳар бир маъруза юзасидан фаол баҳсга киришиш имконига эга бўлди.
Тадбир иштирокчилари ва меҳмонлари ҳомийларнинг эсдалик совғалари ва қуйидаги номинациялар бўйича сертификатлар билан тақдирланди:
- Энг яхши ғоя
- Энг яхши спикер
- Энг яхши тақдимот
- Энг яхши модератор
- Энг яхши савол
- Энг яхши ҳамкор
- Энг яхши ташкилотчи
- Энг яхши ахборот ҳамкори
- Йил профессионали
- Томошабин танлови
Изоҳ (0)