Таниқли сўз устаси Instagram’даги саҳифасида ўзбекистонлик икки машҳур режиссёр — Рустам Саъдиев ва Шуҳрат Аббосов билан тушган суратларини жойлаштирди.
Обид Асомов режиссёр Рустам Саъдиев билан тушган сурати остида шундай изоҳ қолдирган: «‘Муҳаббат синовлари’, ‘Келгинди куёв’, ‘Келгинди келин’, хуллас, келгиндилар ҳақида кинолар олиб, машҳур бўлиб юрган эди. Энди наркомафияга қўшилиб, ‘Барон’ деган жуда шов-шувга сабаб, даҳшатли кино олди».
«Ўзбекнинг Стивен Спилберги деган бўлардим, лекин Спилберг олган киноларига миллионлаб фойда кўриб, долларга чўмилиб ётибди. Рустам бечорани киноси экранга чиқамасидан бозорга чиқиб кетди. Ўзбекчилик. Бечора зарар қилса қилди, бир сўм ҳам фойда қилмади. Хуллас, худойи фильм. Лекин Худо берган талант!», — дея қўшимча қилди Обид Асомов.
Обид Асомов 10 апрель куни режиссёр Шуҳрат Аббосов билан тушган суратини Instagram’га жойлаштирган. «Ўзбекнинг энг буюк режиссёрларидан бири Шуҳрат Аббосов 85 ёшни қаршилаб, шукронасига ош берди. ‘Маҳаллада дув-дув гап’ни кўрмаган ўзбек бормикан дунёда? ‘Сен етим эмассан’, ‘Оловли йўллар’, ‘Отамдан қолган далалар’, эҳ, қайси бирини айтай!», — деб ёзди Обид Асомов.
«Нима кино олган бўлсалар, ҳаммаси шедевр! Ҳали ҳам ижоддан тўхтаганлари йўқ. Ош ҳам киноларига ўхшаб мазали чиқибди. Хуллас, текин ошни урволиб, қайтимига расмга ҳам тушиб олдим. Умрлари бундан-да узун бўлсин!», — дея қўшимча қилди Обид Асомов.
Изоҳ (0)