Хонанда Шаҳнозабонунинг вафотидан сўнг, унинг ҳамкасбларидан бири — хонанда Манзура жанозага санъат олами вакилларидан кўпчилик келмагани ҳақида айтиб, санъаткорларни танқид қилган эди. «Qalampir.uz»нинг ёзишича, Манзуранинг бу гапларидан Шаҳнозабонунинг қизи ва отаси жуда ранжиган.
«Хонанда Манзуранинг мен ва онамга нисбатан куюнчаклигини тўғри тушунаман, бироқ бундай интервью бермасдан, оғир вазиятда бизни қўллаб-қувватлаши керак эди. Аза — уч кун. Манзура уч кун уйимизда ўтиргани йўқ, ким келиб-келмаганини у қаердан билади? Кўнгил сўраб келганлар ҳам Манзурани кутиб ўтиргани йўқ», — деди Шаҳнозабонунинг қизи Умида.
«Онамни охирги манзилга жўнатишга улгурган санъаткорлар жуда кўп бўлди, эртаси куни ҳам кўпчилик келди. Ҳозиргача таъзия билдириб келаётганларнинг охири кўринмаяпти. Кечагина бастакор Шаҳноз келиб кетди, ундан аввал Ўзбекистон халқ артисти Зулайҳо Бойхонова келганди», — деди Умида.
«Онам одамларни ҳар қандай вазиятда тўғри тушунадиган аёл эди ва бу ҳислатлари менга ҳам ўтган. Ўша кунлари кўпчилик санъаткорлар Наврўз тадбирларида бўлган, биз буни тўғри тушундик. Шу сабаб Манзуранинг ‘Шаҳнозабонунинг жанозасига ҳеч ким келмади’, деган гапларидан жуда жаҳлим чиқди. Жанозадаги одамларнинг сони фақат санъаткорлар билан ўлчанмайди-ку», — деди Умида.
«Мен онамни йўқотдим. Бу дардни бошидан ўтказмаган одам мени тушунмайди. Жанозага дунё юлдузлари келган тақдирда ҳам онам энди қайтиб келмайди. Манзура шу гапларни гапиришдан аввал ҳар бир гаплари бизга қандай таъсир қилишини ўйлаб кўрмадимикин?!», — дейди Шаҳнозабонунинг қизи Умида.
Эслатиб ўтамиз, хонанда Шаҳнозабону 14 март куни 42 ёшида вафот этган эди. Орадан кўп ўтмай, хонанда Манзура Шаҳнозабонунинг дафн маросимида эстрада вакилларидан деярли ҳеч кимни кўрмагани ҳақида баёнот берган эди.
Изоҳ (0)