«Даракчи» газетасининг 7 апрель сони «Ринг» саҳифасида актрисалар — тажрибали Хосият Ҳусанова ва ёш Севара Солиева меҳмон бўлди. Ўзаро суҳбат давомида икки санъаткор ҳам яқинда эфирга узатилган, устоз санъаткорлар ҳам қатнашган клипни муҳокама қилган.
Севара Солиева: —Яқинда клипларнинг бирида устоз санъаткорларни кўрдим. Очиғи, уларнинг ижросини аслида рол ҳам деб айтиш қийин. Биз ёшларни бачканаликда айблаб турган бир вақтда, устозларимизнинг бу қилиқларига сиз нима дейсиз?
Хосият Ҳусанова: — Мен ҳам у клипни кўрганимдан буён ўзимга келолмаяпман. Нафақат профессионал актёрлардан, балки бошқаларда ҳам устозларнинг клипдаги иштироки ҳақида танқидлар эшитяпман. Ва бундан хафа бўляпман. Уларнинг ижодига танқидим, фикр билдириш шахсан мен учун жуда қийин. Бироқ уларнинг бу иши ҳақида кимдир гапириши керак-ку.
Севара Солиева: — Клипмейкер уларни клипда рол ўйнашга рози қила олибдими, демак, бирор бир сюжет ўйлаб топиши керак эди. Бу ишда мен клипмейкернинг айби катта, деб биламан.
Актрисалар суҳбат давомида сўз айнан қайси клип ҳақида бораётганига аниқлик киритмаган бўлса-да, катта эҳтимол хонанда Ҳожиакбар Ҳайдаровнинг «Дўлана» қўшиғига ишланган, танқидларга сабаб бўлган клипини муҳокама қилган. Мазкур клипда Ўзбек миллий академик драма театрининг Эркин Комилов, Теша Мўминов, Ҳамид Тошпўлатов каби таниқли актёрлари суратга тушган.
Аввалроқ Эркин Комилов мазкур клипда суратга тушганидан афсусда экани, Теша Мўминов қандай клипда суратга тушаётганини яхши билмаганини маълум қилган эди, Ҳамид Тошпўлатов эса актёр сифатида уят иш қилмаганини таъкидлади. Ҳожиакбар Ҳайдаровнинг ўзи ҳам танқидларга жавоб берди.
Изоҳ (0)